ती अशी एक कविता..

कविता, अढळ, अटळ, सुनिश्चित अर्थांची,

कविता, बेधुंद प्रेषितांची, मुक्त बंधनांची,

मुक्त गंधांची, निराळ्या रंगांची, वेगळ्या ढंगांची,

ती अशी एक कविता..
मज कावेत घेणारी, शब्दांचा घास भरवणारी, विविध अर्थांची, विविध छटांची, मज नकळतच आपल्या प्रेमात पाडणारी,

ती अशी एक कविता..
मनातील श्वेत पर्नावर उतरणारी, कधी हसवणारी, कधी रडवणारी, आठवणींच्या जंगलात सैर करायला लावणारी,

ती अशी एक कविता..
मनाच्या एका कोपऱ्यात उसासे टाकणारी, आठवणींच्या जगात रडवणारी, ध्येयाधुंद करणारी, जुजबी-निर्भिड,

ती अशी एक कविता..
अप्रत्यक्ष प्रत्ययावत करणारी, कधी मनाचा ठाव घेणारी, फुल-पाकळ्यांत, पडणाऱ्या पावसात मंद-मंद खुलणारी, फुलणारी, भिजवणारी,

ती अशी एक कविता..
कधी मोकळ्या रानात बागडणारी, पक्ष्यांच्या किलकिलाटांनी उभारी धरणारी, पाठाच्या पाण्यात खळखळणारी, झाडांच्या फांद्यांवर सुळसुळणारी,

ती अशी एक कविता..
राधा-रमणाची, संत कुबेराची, मुक्ताईची, नामदेवाची, विविध पौराणिकांची, साहित्यिकांची..

पूर्वेकडून पश्चिमेकडे टकमक बघणारी, उत्तरेकडून दक्षिणेकडे हरवणारी, सत्कर्मांची माळ गुंफणारी,

ती अशी एक कविता..
कविता संगिताला नाचायला लावणारी, चाळाला छुमछुम करायला लावणारी, तबल्यावर हात मारायला लावणारी,

मैफील जमवणारी तर कधी एकटीच एकांतात रमणारी, मनाच्या कप्प्यातून अबदार ओठांवर येणारी,

ती अशी एक कविता..
अचंबित करणारी, बेभान करणारी, कधी लाजवणारी कधी, कधी हळहळणारी, मंद मंद प्रकाशात, मनाच्या कालवलेल्या चिखलात कमळासारखी फुलणारी,

ती अशी एक कविता..
कविता तुमची, कविता माझी, कविता साऱ्या विश्वाची,

नकळत ओठांवर येणारी, शब्दांची भुकेलेली परंतु शब्दसमुहांची भूक भागवणारी, शब्दांत श्वास शोधणारी,

ती अशी एक कविता..
तुमची – माझी, माझी – तुमची, सर्वांची लाडकी,

अल्लड, उत्साही, उताविळ, चावट, चंचल,

ती अशी एक कविता..
#कवितामाझीसखी


– © विवा

Advertisements

बरसत होतंआभाळ सारं…

बरसत होतंआभाळ सारं…

बरसत होतं आभाळ सारं काही वर्षांपूर्वी.. वाढत होती गर्दी रातीला, गरजून बरसण्यासाठी, कधी दिवसालाच रात्र भासवण्यासाठी…

नव्हती उसंत…
ना त्याला, ना ही तिला…
आज आटलेली “ती किसनामाई” सुध्दा आर्त साद देत होती..
बरसेल आता-पुन्हा, त्याच जोमाने अशी आशा करत होती… दुथडी भरून वाहण्यासाठी.. जीवन वाटत जाण्यासाठी…

वर्षातून एकदाच येणारा “तो पाहुणा” रूसला होता, फुगला होता..
अवचित वेळी कसा बरसणार याचाच विचार करत राहिला होता…

हिरमुसलेल्या या मातीला गहिवर येईल असं वाटलं नव्हतं, बरसेल पाहून हालत तिची, असं मलाही पक्कं वाटलं होतं…

आभाळात काळवंडलेल्या छटांनी आशा पल्लवीत झाली होती..
आठवलं नंतर की गुदस्ता, चिंब भिजायला, थय-थय नाचायला, काय मजा आली होती…

झाडं, वेली, पानं, फुलं आणि साऱ्यांचीच आशा शिगेला टांगली होती.. भजनासाठी आलेली मंडळी आज जरा लवकरंच पांगली होती… “तो” येईल म्हणून..

मंदिराच्या चौथऱ्यावर पुजारी जाऊन आला नि तो आला असल्याचा संदेश घेऊन आला..
बरं वाटलं मला, बरस असाच सर्वत्र… मुसळधार..
करून टाक सारा हा शिवार हिरवागार…

माफ कर त्या “चालत्या-बोलत्या मर्कटाला”, दरिंदीपणा थांबवेल तो.. झाडं तोडण्याचा… घाण करण्याचा…

नाही ठरवणार तुला कारण दुष्काळाचे, भोगेल तोच दुष्परिणाम त्याच्या कर्माचे…

मी हात जोडतो तुला नि गाभाऱ्यात कर कटावर असलेल्या त्यालाही…
बरस तू मुसळधार.. त्याच जोमाने… जसा बरसायचास… “काही वर्षांपूर्वी….”

# कवितामाझी #सखी

– © विवा

लवकरच विसर पडतो…

लवकरच विसर पडतो…

लवकरच विसर पडतो, काही गोष्टींचा…

काही व्यक्तींचा, काही व्यक्तिंना, 

काही नात्यांचा, काही नात्यांना… 

जवळच्या-दूरच्या… सगळ्याच..

नकळतच घडतात अशा गोष्टी, ज्या गणल्या जातात नाहक, कुणाच्या ही ना अनुरूप..

काळ येतो भकास आठवणीत, घेऊन वादळी प्रक्षोभ, तेंव्हा “तो” (मित्र/सखा/सोबती) होता साथीला, घेऊन सारथी स्वरूप…

बनतात गोष्टी त्याच्याच, ज्याच्या आठवणी लोटतात काळाबरोबर.. हरवतात क्षण ते सुवर्ण गणलेले…

वजा कर समजातले गैरसमज सारे, माऊली-भगिनी रूजवी मनधरणी, मन ना होतसे राजी त्याचे, शेवटी त्याचीच मनघडनी…

मोह-म्रुगजळ कारण तयाचे, उगाचच मनी गुढ भावना,
असता नाते मैत्रीचे नकोस खेचू मज वदना…

मित्र आहे चांगला, भला.. होता भला… असेल का तो पुन्हा चांगला?

विरले-हरवले ते क्षण कुठे, होऊन भंगुर.. येतील का ते दिवस पुन्हा भेट द्यावया, घेऊन आनंदाचे क्षण भरपूर?

– © विवा

धडा

आयुष्य दरवेळी नवी वळणं घेतं, नवं काहीतरी शिकवतं. जेंव्हा कुणीतरी तुम्हाला दुखवतं, हृदय भग्न करणारे अनुभव देतं तेंव्हा त्यांच्यावर चिडू नका. त्यांना क्षमा करा. कारण त्यांनीच तुमच्या मानसिकतेला सदृढ बनवून तुम्हला सावध राहण्याचा, चटकन विश्वास न ठेवण्याचा नवा “धडा” दिलेला असतो.

– © विवा

प्रयत्न आणि नशीब

यशस्वी होणे हा नशीबापेक्षा प्रयत्नांचा भाग आहे. यश मिळविण्यासाठी आपल्याकडे या काही गोष्टी असायला हव्यात. त्या म्हणजे; आपल्याकडे इतरांपेक्षा जास्त ज्ञान हवं, इतरांहून आपलं काम जास्त आणि चांगलं हवं आणि अपेक्षा मात्र इतरांहून कमी हव्यात तसेच सामंजस्य आणि बोधामृत देखील महत्वाचं. असे काही गुण तुमच्यामध्ये असतील तर तुम्हाला यशस्वी होण्यापासून कोणीही रोखू शकत नाही!


– © विवा

आई असते म्हणोनी . . .

“मुलाला बरं वाटावं म्हणून थरथरत्या हातात पोथी धरून मंदीरात बसलेली आई . . .    मूकबधीर मुलाला प्रेमानं सांभाळणारी आई . . .    मुलीला शिकवून मोठ्या पदावर पाहण्याचं स्वप्न रंगवणारी आई . . . कितीहा संकटं आली तरी घारीसारखं आपल्या मुलांचं रक्षण करणारी आई . . . किती रूपं असतात ना. .   आईच्या मायेची . . .!  कधी उदास, एकटं वाटलं की आईची फोटोतली हसरी नजर सोबत करते. . .   जगण्याची उमेद देते!”

– © विवा

अपयश आणि निराशा

अपयश आणि निराशा दोन्ही हातात हात घालून येतात, परिक्षा घेतात, गती कमी करतात परंतु ; आपल्याला थांबवत कधीच नाहीत, उलट आपल्यला बरंच काही शिकवून जातात.

– © विवा

प्रेम

एखाद्यावर प्रेम करताना अहंकाराला स्वतःपासून दूरच ठेवा. “प्रेम” मिळवण्यासाठी अहंकार गमावलात तरी चालेल, पण ज्या व्यक्तीवर तुम्ही मनापासून “प्रेम” करता त्या व्यक्तीला तुमच्या अहंकारामुळे गमावू नका. कारण “प्रेम” ही एखाद्यावरच मेहेरबान होणारी आणि एखाद्यालाच लाभणारी दुर्मीळ संपत्ती आहे.

– © विवा

माझेच अनुभवाचे बोल . . .

आयुष्यात भूक, अपमान आणि मिळालेला अनुभव या तीन गोष्टी नेहमी लक्षात ठेवा. माझ्या मते आयुष्याची वाट चालताना भेटलेले हेच तीन गुरू माणसाला त्याचं स्वतःचं आयुष्य समृध्द करण्यासाठी प्रेरणा देतात.

– © विवा

Create a website or blog at WordPress.com

Up ↑